《帽子》（午言）

人类进化最大格标志就是晓得了隐密性、懂得了羞耻感，从赤身裸体到穿衣带帽，亚当、夏娃偷吃了禁果，上帝顺手就扯下来树叶子遮了人格羞，人类就此从野蛮走向了文明、狩猎走向了农耕！

中华文明有几千年，今朝讲一讲老早格“帽子”，古代呒么美容美发院，侪留长头发，发肤之亲，娘胎里带来格（下趟讲和尚为啥要拿头发剃脱），侬身浪厢要着衣裳，格么头浪厢也应该着件衣裳喽，帽子就来了，所以也叫做“头衣”，伊有两个作用：一，为了保护头发，二，为了行动方便。所以，拿头发盘起来，囥勒了帽子里厢。

本来是平常事，平常人侪可以戴，各种料作、各种颜色侪可以，但是当人分出来等级之后，马上炒出来一只话题，当官格朋友，要着官服、戴官帽，侬当官就要讲究礼仪，拿头发束只簪，披头散发格朋友肯定勿是做官格人。

春秋战国辰光格官帽又高又长，勒了公元480年，卫国发生宫庭政变，孔子格学生——子路，被反叛者包围，人也要走了，还整一整衣帽，讲了一句：“君子死，冠不免”，也就是讲子路临死之前格动作是要拿帽子戴戴好！哦！千万勿要当笑话谈啊，子路此举是体现出了一种贵族精神，虽被砍成肉泥，但是非常悲壮！电视剧《大秦赋》里厢格官帽勿一样了，呒么像春秋嘎高了，但是讲究发簪格花纹，服饰也改了。到了刘邦辰光，官帽恢复了，又高又大，头发统通囥勒起来。再下来是东西两晋南北朝，伊拉拿头发露出来了，只是区别了魏蜀吴三国所谓格美观而已。唐太宗唐朝辰光，既拿官帽高度降低了，还配了两根像耳朵一样格发簪，大唐就体现了唐朝格随意性。到宋朝辰光，通过陈桥兵变爬上来格宋太宗赵匡胤时期，最有意思了，宋朝从头到底重文轻武，怕一道打江山格兄弟们造反，用“杯酒释兵权”大家侪晓得了，但是，老赵拿官帽高度降得邪气邪气低，勿大注意吧，为啥呢？侬万一拿暗器囥勒帽子里厢呢？帽子贴牢头皮了，难度就增加啦！还有花头了，伊用铁皮、竹篾做成帽子格骨架，再加了两根官檐，搿能一来，官帽两旁边加了两根足足有一尺多长格长翅，当然是居安思危呀，老板勒了上头讲闲话，倷勒了下头窃窃私语、交头接耳、触落触落，讲眼啥么事、想妄议啊？谈都不要谈，现在侬头浪厢戴好了一只新式帽子，只要侬脑袋稍微一动，马上刮三，两根帽翅就会得上下抖动，兄弟们只要交头接耳，一勿当心两只官帽就会互相碰擦，弄得勿巧就会拿官帽互相碰下来，碰脱帽子，就会厾脱位子、少脱银子、敲脱饭碗、割职滚蛋…… 老赵自家野路子上来，怕透了，所以宋朝格官员相互之间侪会得保持距离，勿会并排而坐，只好人面对肉面，大家面对面排排坐，有啥讲啥，始终生怕“乌纱帽”落脱，连走起路来也是小心翼翼，哈哈、侬格一举一动，皇帝看得来清清爽爽！挨下来讲元朝忽必烈来了，马背浪厢格游牧民族外邦人，官帽特色就是一顶大草帽，侪可以塞进去，但是侬一定要用带子结牢。元朝，有一个问题蛮奇怪，阿拉勿大讲伊拉，啥道理？侬看，元朝皇帝陵几乎呒么啥人讲，伊拉打了就走了，像熊瞎子，走一路厾一路，留下来么事老少。哦，勒了青浦金泽镇浪厢倒是留下来一座非常完整格元代石桥，两旁呒么栏杆，但是有石卵子做靠档，让马走格，正宗马路。文艺方面只有《窦娥冤》搭《赵氏孤儿》有眼名气，元曲也勿像宋词唐诗留拨后代嘎许多！元朝后是明朝了，先插一句：大哉乾元，大明终始，侪是周易彖辞坤卦，冥冥之中，元朝、明朝！明朝朱元璋来了，老朱是中国最操心格皇帝，样样要管，随便啥格事体侪要亲历亲为！规定官帽：“凡常朝视事，以乌纱帽，团领衫，束带为服”。哦官方认定了 ：“乌纱帽”就是官帽，影响留传至今，现在舞台传统戏格戏装就是明朝辰光格服装，舞台浪厢整冠格动作就是明朝格礼仪。明朝之后是清朝，清朝全盘继承明朝格律法，文字……，却拿“乌纱帽”废除了，因为是满人，所以清朝花翎是官帽……

当代人有辰光也会流行各式各样格帽子，但是有一种帽子是顶顶结棍格！因为伊是色不异空的，伊拉工厂里专门生产搿种帽子，动勿动就会送一顶拨侬，交关人戴了一辈子，会拨帽子压煞！

好白相，讲了一眼帽子格历史……

昔君乌纱帽

赠我白头翁

帽今在顶上

君已归泉中

物故犹堪用

人亡不可逢

岐山今夜月

坟树正秋风

白居易也写《帽子》